L'ASTURIES LLIBERAL

La policía danesa anunció'l prindamientu de cuatru sospechosos d'entamar un atentáu contra Kurt Westergaard, ún de los caricaturiestes del periódicu Jyllands-Posten, que publicó en setiembre de 2005 unes viñetes sobro Mahoma. Un portavoz de los servicios secretos daneses confirmó que la operación pa desaniciar la célula terrorista fízose a primera hora de la mañana del martes y dixo que l'acción tuvo un calter preventivu y realizóse cuando los integristes taben na fase anicial de los preparativos p'atentar contra Westergaad, que yera ún de los 12 dibuxantes que caricaturizaron a Mahoma. Esti caricaturista, de 73 años, y la so muyer Gitte, de 66 años, lleven meses con protección policial. La dirección de Jyllands Posten vien siguiendo durante dellos meses con gran esmuelgu la discreta xera de la Seguridá de Dinamarca y de los Servicios d'Intelixencia pa guardar al dibuxante de los planes d'asesinatu. "Esperemos que les detenciones sirvieran pa torgar estos planes", destacó'l director del diariu. Tamién indicó que se demonizó y amenazó a un profesional que fai'l so trabayu con respetu a les lleis y el códigu deontolóxicu daneses. L'afectáu afirmó que les fuerces de seguridá-y comentaren los planes qu'había contra elli, pero que más que mieu tuvo "ira y indignación". Amás manifestó'l so temor por que les repercusiones de la caricatura puedan durar pal restu de la so vida, "ye triste, pero convirtióse nuna circunstancia de la mio vida". El diariu Jyllands Posten publicara en 2005 una dolcena de caricatures del profeta Mahoma que nun primer momentu pasaran desapercibíes, pero que meses depués provocaron una fola protestes en dellos llugares de relixón islámica. Les manifestaciones contra la publicación acabaron con más d'un centenar de muertos n'estremaos países. Westergaard pintó a Mahoma como un home barbáu y siniestru, que nel turbante lleva una bomba.

Esbilla | del.icio.us