L'ASTURIES LLIBERAL
Bitácora del Círculu Lliberal d'Asturies

 La Embaxada del Estáu d'Israel mandó un comunicáu de prensa nel qu'espresaba'l so descontentu ante la polémica situación desencadenada nel Parlamentu Gallegu y que va algamando cotes nacionales y inclusive europees. El BNG refugó recién la publicación d'una declaración de conderga del Holocaustu si nun s'incluyía nella la situación actual na Franxa de Gaza, onde gobierna una dictadura del movimientu terrorista y integrista H.amas. El partíu gallegu negóse a sofitar la Declaración Institucional en Recordanza de les Víctimes del Holocaustu, tomando una postura inédita nel continente nun partíu parlamentariu.

El maltar de la embaxada israelí ye tovía mayor por nun apreciar reacción nenguna per parte del Gobiernu d'España, que nun se pronunció públicamente sobre la negativa del BNG nin emitió nenguna declaración. L'embaxador hebréu en Madrid, Raphael Schultz, nun descarta presentar una protesta formal ante l'executivu de Rodríguez Zapatero, si bien ya contactó col Ministeriu d'Esteriores p'amuesar "la so fonda esmolición por esti tema", sigún diz la nota de prensa. Pa Schultz, "nun esiste actualmente n'Europa otru partíu que refugue'l Holocaustu" polo que'l Gobiernu "nun debería dexar pasar” l'asuntu. Amás, pal Estáu d'Israel ye inda más  “terrible y preocupante” el fechu por tratase d'un partiíu con responsabilidaes de gobiernu que s'opón a sofitar una conderga del xenocidiu.

Dimisión d'un conceyal nacionalista gallegu

Un edil del propiu BNG, Abel García López, dimitió como conceyal en Neda (La Coruña), en protesta pola postura del so grupu parlamentariu. “Dimito porque nun quiero tar nuna organización na que los sos principales dirixentes odien a los xudíos y al pueblu xudíu”, proclamó nun comunicáu'l conceyal. García López considera l'alusión del BNG al bloquéu de la Franxa de Gaza “un ataque al Estáu d'Israel”. “El día que'l mundu recordaba a les víctimes del Holocaustu, na so inmensa mayoría xudíos, el BNG realizaba un ataque a los descendientes d'estes persones”.