L'ASTURIES LLIBERAL

Pilar Fernández Pardo, Senadora y Presidenta del Partíu Popular de Xixón

La situación económica ye, ensin nenguna dulda, la más grande esmolición de los asturianos nesti primer deceniu del sieglu XXI. Asturies vive nuna crisis que paez permanente, nun hai trabayu y una parte escandalosamente numberosa de la nuestra mocedá, eso que dalgunos llamen “leyenda urbana”, tien de salir de la so comunidá autónoma p’afayar una colocación digna. Esta realidá ye dalgo que los asturianos conocemos mui bien. La crisis económica vien siendo’l nuestru mayor problema dende los años setenta y alrodiu d’ella ficiéronse infinidá d’análisis  y propuestes de tou tipu. El problema ye que nun contamos con un factor ensin el que nun se pue salir d’esta crisis económica. Esi factor ye la mentalidá política. Los sucesivos gobiernos autonómicos d’izquierda, qu’atropen más de dos décades en funciones executives, muncho tuvieron de facer mal cuando cuesta tanto alcontrar una provincia española que tenga menos crecimientu económicu que nosotros. Y ye que'l fracasu en llograr una salida a esta situación allúgase precisamente na ausencia d’esa mentalidá, adaptada a los nuevos tiempos, emprendedora, lliberal, que tan bon resultáu-y ta dando a comunidaes punteres como la madrilana o la valenciana. Contra la lóxica de la historia y del propiu progresu, n’Asturies, durante munchos años, fue perpetuándose una concepción de lo que tendría de ser la nuestra forma d’articular un proyectu comunitariu totalmente llonxana a nosotros mesmos. La izquierda gobernante dibuxó una Asturies anclada nunos referentes, en gran midida reinventaos, que nacieran nos años treinta del pasáu sieglu. Xunto a ello la so xestión basóse en copar tolos ámbitos de la nuestra sociedá, por pura estratexa de poder, ensin construir instrumentos válidos pal desarrollu económicu, social y cultural. Más allá de l’asignación de cargos o l’inventu de chiringuitos por toos conocíos nun tienen nel so haber otra carta de presentación, como nun sía’l so empeñu, trufáu del más ranciu internacionalismu, en nega-y espacios a aquello claramente identificable como asturiano. Consecuencia de too ello ye’l declive de la nuestra comunidá autónoma. Una cuesta abaxo que debe, y pue, ser eliminada. Y nun ye esti cambiu de camín una xera imposible pala xente d’Asturies. De la nuestra capacidá dimos cumplida muestra pelo llargo de la historia. La nuestra tierra aportó una llarga relación de nomes qu’evidencien les nuestres posibilidaes innates pal trabayu bien fechu, pal progresu humanu, pa la cultura, pa la economía y, por supuesto, pa la política. Esi cambiu necesariu y yá urxente pa dexar atrás la crisis que los gobiernos de la izquierda vienen agravando de constante, esi cambiu que la gran mayoría de los nuestros ciudadanos desea, ha nacer con una mentalidá política nueva. Una mentalidá que nun arrequexe a eso que meyor nos define, a la nuestra idiosincrasia y identidá, nos espacios mínimos onde se quiso char tolo que nun cuadrara cola Asturies antigua y desfasada del oficialismu gobernante. La sociedá civil asturiana lleva años esbrozando esa nueva ruta. Múltiples iniciatives, les más de les veces ensin malpenes apoyu de l’alministración autonómica, xurden tolos díes en tolos puntos de la nuestra xeografía. Iniciatives impulsaes dende’l sentíu común y la defensa de los intereses asturianos que, si contaran col respaldu que merecen, aidaríen a reconducir l’estáu de coses pa devolve-y a Asturies capacidá pa planificar un futuru dignu, exitosu, que la vuelva a situar ente les primeres comunidaes d’España. Pero la iniciativa ciudadana nun se pue ver güérfana del respaldu institucional. Una nueva mentalidá tamién tien de llegar a los órganos de representación de los nuestros ciudadanos, a la Xunta Xeneral del Principáu, a los ayuntamientos. Dende la nuestra opción política tamos trabayando pa llogralo. Una nueva mentalidá, moderna, dinámica, creativa, que nos empobine hacia una nueva Asturies.

Esbilla | del.icio.us