L'Asturies Lliberal

Vicente Gotor Santamaría caltién el compromisu que firmara va cuatro años cola Xunta pola Defensa de la Llingua Asturiana p'apoyar la normalización del asturianu en dientro la Universidá d'Uviéu.

El candidatu lliberal definió'l so posicionamientu asturianista per aciu del decálogu que sigui:

1.- Asturies vive nuna realidá de billingüismu; poro, la Universidá tien de caltener, potenciar y curiar la llingua d’Asturies y de los asturianos. Defenderáse’l billingüísmu en toles sos estayes.

2.- Propondráse y defenderáse la implantación de la llicenciatura de Filoloxía Asturiana y la titulación de Filoloxía Asturiana en Maxisteriu.

3. Dende'l Rectoráu propondráse y defenderáse, ente los órganos de gobiernu de la Universidá, que la imaxe corporativa de la Universidá d'Uviéu tenga un emplegu únicu oficial billingüe asturianu-castellanu, n'igualdá de condiciones pa dambes llingües. Esto afectará a la retulación de dependencies, los impresos oficiales y páxina web de la universidá. Asinamesmo, dende'l Rectoráu propondráse y defenderáse que l'atención al públicu y, en xeneral, toles comunicaciones esternes y internes de la Universidá d'Uviéu serán billingües, lo qu'habrá de conllevar la formación y reciclaxe de los profesionales correspondientes. La docencia y la redacción de los esámenes podrá facese nes dos llingües. Nos casos nos que la ufierta docente lo permita, los estudiantes podrán escoyer docencia n'asturianu o en castellanu.

4. Dende'l Rectoráu propondráse y defenderáse, ente los órganos de gobiernu de la Universidá, la puesta en marcha d'un Serviciu de Normalización Llingüísticu, afitáu por comisiones nos respectivos campus universitarios, que se coordinarán pa entamar midíes col xacíu de normalizar l'emplegu de la llingua asturiana na Universidá.

5. Dende'l Rectoráu propondráse y defenderáse, ente los órganos de gobiernu de la Universidá, la puesta en marcha d'un Plan de Normalización de la Llingua Asturiana con unes estratexes, oxetivos y tiempos determinaos.

6.- Redactaráse un Reglamentu internu del usu del asturianu na Universidá d’Uviéu.

7.- Fadránse unos Presupuestos específicos de la Universidá d’Uviéu destinaos a la potenciación y puesta en marcha de les midíes oportunes al rodiu de la normalización y promoción de la llingua asturiana.

8.- Habrá una llinia d’ayudes específiques pa la difusión n’asturianu, lo mesmo en tesis, trabayos, ponencies, investigaciones, conferencies…

9.- Fomentaráse y promocionaráse la investigación al rodiu de la filoloxía asturiana y la llingua asturiana al traviés d’ayudes.

10.- La Universidá d’Uviéu tien de dir faciendo camín, siendo un promotor y dinamizaor pa que la normalización de la Llingua Asturiana seya un fechu real y visible pa la comunidá tanto universitaria como la sociedá asturiana en xeneral.