L'ASTURIES LLIBERAL

Un estudiu publicáu pol Gabinete d’Iniciatives Tresfronterices dependiente de la Conseyería de Presidencia de la Xunta d’Extremadura vien a reconocer una vegada más a la fala extremeña como un subdialectu de la llingua asturiana o asturlleonesa. L’autor del mesmu ye José Martín Durán, espertu llinguista y conocedor de les fales norteñes d’Estremadura y el llibru lleva por títulu: "A fala, un subdialecto leonés en tierras de Extremadura". El volume fai el númberu 7 d’una riestra de publicaciones feches pol Gabinete de Presidencia referíes a la recuperación llinguística n’Extremadura. Separtándose de les teoríes calteníes polos anteriores investigadores galleguistes y lusistes, Martín Durán vien a defender que A fala nun ye una modalidá llinguística perteneciente al bloque gallego-portugués, sinon que forma parte del ámbitu lliguísticu o bloque subdialectal de la llingua asturiana o asturianu. Esta obra algama un detalláu análisis fonolóxicu y morfolóxicu sobre A fala, un comentariu filolóxicu y una comparanza ente a fala extremeña y l’asturianu. El llibru recueye tamién una riestra d’aforismos en versu. La pertenencia de la fala extremeña al bloque asturlleonés, anguañu yá aceptada, ye asemeyada al procesu de reconocencia del mirandés como modalidá xenuínamente asturlleonesa, yá que hasta entamos del sieglu XX el mirandés considerábase variante del portugués y non parte del asturlleonés. La fala n’Extremadura tamién se-y noma popularmente como valvedeiru, chapurreiáu, lagarteiru y mañegu y allúgase na provincia de Cáceres.

Esbilla | del.icio.us