L'ASTURIES LLIBERAL

L'Índiz de Precios de Consumu (IPC) nel Principáu d'Asturies medró nel mes pasáu cuatro décimes en comparanza col mes anterior, lo qu'alluga la tasa interañal nel 4,1 por cientu, según los datos publicaos pol Institutu Nacional d'Estadística (INE). 

A nivel estatal, l'indicador amuesó un incrementu de cuatro décimes nel mes d'avientu respecto a payares, lo qu'asitia la tasa interanual nel 4,2 por cientu, la cota más alta dende xineru del 2006. De xineru a avientu, la infación atropó tamién un aumentu del 4,2 por cientu. Esta ye la segunda vegada que la inflación algama'l 4,2 por cientu nesta llexislatura, tres llegar al mesmu nivel en xineru del 2006, y torna asina na cota más alta rexistrada nos cuatro años de gobiernu socialista de Rodríguez Zapatero.

   L'índiz que rexistró una más grande subida de preciu n'Asturies foi l'ociu y la cutura, con un incrementu del 1,2 por cientu respecto a payares, pola mor l'aumentu de tarifes del viaxe organizáu. Amás, los precios de los alimentos y bebíes non alcohóliques medraron un 1,0 por cientu en virtú del incrementu de los precios de los pescaos, crustáceos, moluscos, carne de vacunu, frutes fresques y quesos. Mientres, les tarifes del Tresporte crecieron nel mes d'avientu na comunidá autónoma un 0,8 por cientu pol aumentu de los carburantes y llubricantes. Los precios de los Hoteles, cafés y restaurantes subieron un 0,6 por cientu , principalmente pola evolución de les tases de los restaurantes, bares, cafeteríes, cantines y comedores. Tamién el capítulu d'otros subió un 0,6 por cientu. De la mesma manera, los indicadores de Menaxe sufrieron un crecimientu del 0,6 por cientu, la Medicina un 0,2 por cientu y la enseñanza un 0,1 por cientu.

Esbilla | del.icio.us