N’avientu de 1993 l’asociación d’escritores en llingua asturiana mandára-y al entós presidente autonómicu Antonio Trevín una propuesta pal apoyu a la lliteratura del país. Nel testu pidíase que se promoviera “nel marcu del cumplimientu del artículu cuartu del Estatutu d’Autonomía p’Asturies, el fomentu del procesu creativu ya industrial del llibru, tanto científicu como lliterariu, y la so difusión per aciu d’un organismu (Institutu del Llibru Asturianu) que realice un programa de desarrollu integral, de tal xeitu qu’esi mercáu potencial se faiga realidá”. Cuando na mio calidá de representante d’aquella asociación me tocó desplicar tolos aspectos de lo que debería ser esi Institutu alcuérdome que dixi dalgo que podría repetir, cola mesma argumentación, agora mesmo. La verdá ye qu’en pasando catorce años podemos falar otra vuelta de les mesmes necesidaes y carencies no tocante a la promoción de la lliteratura asturiana. Bien poco avanzamos. Tenemos, sí, más autores, más obres, más visibilidá. Hasta tenemos un ciertu prestixu social. Amodo, y esto ye cierto, un conxuntu d’escritores, cada vuelta más numberosu, foi pa dir ufiertando al llector obres de notable interés, guapamente comparables coles meyores de cualesquiera otra lliteratura recién. Tamién podemos afirmar que van creándose espacios abiertos, multidisciplinares y dinámicos, que son válidos pa que les obres y los nomes de les nuestres lletres lleguen a públicos colos que tradicionalmente nun contaron. Nos últimos años, bien d’iniciatives llogren apoyu abondo como pa perfacer nuevos ámbitos de promoción de la lliteratura asturiana, destacando nesto 
l’Arribada, un eventu que llogra niveles de trescendencia mediática desconocíos hasta va poco. Pero’l casu ye que n’otros aspectos l’avance foi mínimu. Nel marcu llegal pa la llingua llogramos una llei d’usu que permitía facer coses, una llei impulsada pol centru derecha asturianu, pero que sucesivos gobiernos d’izquierda convirtieron n’inútil pol so cortu enfotu en desarrollala. Na política editorial, vimos un razonable caltenimientu de les ayudes y un crecimientu de publicaciones, pero al empar un abandonu total de parte de los editores pa coles sos obligaciones de promoción. Y equí daba igual si la editorial yera privada o pública; la promoción simplemente nun esistía y nesa seguimos. Nel fomentu dende les instituciones too queda nunos premios lliterarios y en dalguna ayuda a la creación. Na xera de promoción esterior de la nuestra lliteratura hubo iniciatives estremaes. Unes a la gueta del porgüeyu personal del que les entamaba y, poro, con unos resultaos de mui pequeñu percorríu pal promotor y nulu beneficiu pa la lliteratura asturiana. Otres bien intencionaes, pero feches ensin continuidá nel tiempu. Aquelles que nacieron dende l’Academia de la Llingua o dende los sucesivos departamentos de política llingüística del Principáu, o más cercanes nel tiempu dende la Oficina Municipal de la Llingua de Xixón, fueron llogrando resultaos granibles. Destacaría los trabayos que l’asociación d’escritores fizo pa conseguir la entrada en Galeusca. Daquella, mediaos los años noventa del pasáu sieglu, y tres numberosos alcuentros y actividaes, qu’incluyíen la presencia asturiana en dellos congresos d’esa entidá, l’entamu d’unes xornaes en Xixón cola so directiva (los díes 24, 25 y 26 de febreru de 1995) o la organización d’actos culturales conxuntos coles asociaciones d’escritores que la integren (Associació d’Escriptors en Llengua Catalana, Euskal Idazleen Elkartea, Asociación de Escritores en Lingua Galega), conseguimos l’apoyu catalán al nuestru ingresu. Nuna carta, de 10 de mayu de 1995, que’l Secretariu d’AELC me remite, diznos lo que sigue: “3.- Comunicar-vos la bona predisposició per part dels escriptors catalans per a la vostra incorporació a Galeusca. Et prego que llegeixis el contingut d’aquesta carta als companys de la vostra Junta”. Pues bien, recibimos el respaldu catalán, pero na cuestión del ingresu de los asturianos en Galeusca topamos col vetu gallegu, polos motivos que yá supondrán, y col xuegu de tar al tiempu na misa y repicando por parte de los vascos. El casu ye qu’esa vía torgábase. D’otra parte, en toos estos años, xunto cola deficiente promoción interior de los nuestros autores y obres, na promoción esterior tampoco nun pudimos anotanos el tantu de contar cola figura d’un Manuel Rivas o un Atxaga que sirviera pa entainar el conocimientu fuera d’Asturies del nuestru mundu lliterariu. Hubo autores que llograron publicar obres de calidá n’otres llingües y n’editoriales d’ámbitu español, pero tovía nun asistimos al nacimientu d’una nueva estrella, y asturiana, na primera división lliteraria del estáu. Con too y con ello, vése bien a les clares que fai falta una ferramienta, institucional y bien estructurada, pa empobinar a les nuestres lletres pel camín d’una real promoción tanto dientro d’Asturies como fuera de la nuestra comunidá autónoma, nos correspondientes ámbitos estatales y internacionales. Necesitamos una Institución de les Lletres Asturianes que sía una entidá alministrativa, venceyada al Principáu d’Asturies, que gocie de personalidá xurídica y de patrimoniu propiu, y con capacidá d’obrar pal cumplimientu de los sos fines, que seríen el promover la creación lliteraria n’asturianu per aciu de beques y otra triba d’ayudes teniendo especial procuru na atención específica a la incorporación y difusión d’autores nuevos; el promover el conocimientu y la difusión de la lliteratura asturiana dientro del so ámbitu llingüísticu, fomentando la llectura d’obres en toles estayes de la sociedá y per tolos medios de difusión posibles; el promover el conocimientu de les nuestres lletres n’otres aries llingüístiques, dientro y fuera del estáu, per aciu la ellaboración d’antoloxíes, la subvención de traducciones de calidá, la edición de publicaciones plurillingües y la relación coles universidaes, biblioteques, editores, crítica y centros de difusión lliteraria de tol mundu; el promover la relación de los escritores n’asturianu colos escritores n’otres llingües; el promover la fechura d’actividaes empobinaes a facilitar l’adaptación de les capacidaes de los autores a los nuevos medios de comunicación, como son el guionaxe de cine y vidio, la escritura pa radio y televisión, etc. Esta Institución rexiríase por una Xunta de Gobiernu y tendría un Conseyu Asesor onde participaríen los escritores per aciu de la so asociación, l’Academia de la Llingua, la universidá, representantes de los medios de comunicación, representantes d’asociaciones venceyaes a la promoción lliteraria como ye’l casu de l’Asociación Cultural l’Arribada, el gremiu d’editores y otres instituciones relacionaes cola lliteratura. Pal so allugamientu, propondría la villa de Xixón, en virtú de contar cola meyor rede municipal d’Asturies, pola so especial vinculación a eventos lliterarios, por tener una oficina de la llingua dientro de la so estructura alministrativa municipal y tener ente los sos residentes al mayor númberu d’escritores n’asturianu de tol país. De toes maneres, una Institución d’esti tipu precisa del suficiente apoyu políticu pa la so creación. Nun escaezamos que la so esistencia sería consecuencia del alcuerdu correspondiente na Xunta Xeneral del Principáu y, en virtú d’ello, amás de contar col impulsu del colectivu d’escritores asturianos o de la Conseyería de Cultura, necesita de la complicidá de les fuerces politiques asturianes. Nesi camín ye importante trabayar dende la xestión cultural y tamién dende l’ámbitu políticu. Con enfotu, con tresparencia, y sabiendo qu’una Institución de les Lletres Asturianes tien de ser un instrumentu pa la promoción de los escritores asturianos; de tolos escritores asturianos.
Esbilla
del.icio.us
Nun hai comentarios »