L'ASTURIES LLIBERAL

El diputáu Ramón García Cañal sorraya qu'una de les entidaes que se beneficiaron agabitó na publicación del polémicu 'Construyendo Asturias'

El diputáu del PP na Xunta Xeneral del Principáu acusó güei al gobiernu autonómicu de pagar illegalmente 301.200 euros a la empresa Oca Construcciones y Proyectos pola obra del Centru Deportivu y d'Ociu de Llangréu. García Cañal, qu'afirmó que ta "convencíu dafechu" de que nun ye l'únicu casu d'esti tipu, ofreció estes declaraciones nuna rueda prensa fecha nel parlamentu asturianu, acompañáu de la tamién diputada Alejandra Cuétara. Nella aportaron della documentación, incluyida la relativa a un informe de la Intervención Xeneral del Principáu d'Asturies nel qu'establez nuna nota de reparos que na obra mentada l'importe de la certificación "sobrepasa la llende afitada nel artículu 160 del Reglamentu Xeneral de la Llei de Contratos de les Alministraciones Públiques". García Cañal recordó que'l preciu d'axudicación pal Centru Deportivu y d'Ociu de Llangréu y Circuitu d'Automodelismu en Lada tuvo un preciu d'axudicación de 8.953.134 euros, y que'l total pagáu pola obra al términu foi de 12.547.746 euros, con 301.200 pagaos illegalmente. Atribuyó a l'actual conseyera d'alministraciones públiques y vocera del gobiernu socialista asturianu, Ana Rosa Migoya, la orde de que'l Conseyu de Gobiernu ficiera frente al mencionáu gastu.  Amás, vinculó lo ocurrío col llibru 'Construyendo Asturies' de la que dixo "qué casualidá que se trata de la mesma empresa que collaboró nesa publicación". Pola mor d'ello'l PP tien previsto solicitar na Xunta Xeneral del Principáu la declaración de responsables d'Intervención, asina como d'Ana Rosa Migoya y de los funcionarios que participaron nesti fechu.

Esbilla | del.icio.us