L'ASTURIES LLIBERAL

Pilar Fernández Pardo, senadora y presidenta del Partíu Popular de Xixón. 

Los datos del Informe Pisa 2006 non solo indiquen l’alarmante perda de comprensión llectora de les nuestres xeneraciones más moces, si non que tamién nos confirma l’agravamientu del déficit educativu que sofre la sociedá española. Y ésti ye un déficit que llastra mui negativamente pal futuru la capacidá de desarrollu económicu, social y cultural, amás d’atentar contra la igualdá d’oportunidaes de los ciudadanos. Poro ye una cuestión d’urxencia nacional la xeneración de reformes educatives n’Asturies y n’España porque los nuestros estudiantes necesiten pa la so formación una enseñanza de calidá, y nun se ver somorguyaos en conteníos absurdos como los de l’asignatura Educación pa la Ciudadanía.

El nuestru sistema educativu tien que se centrar nuna axustada adaptación a los retos que van afrontar los nuestros neños nos años vinientes, ye dicir, a los que dibuxen les nueves tecnoloxíes y les ciencies, polo que ye imprescindible aumentar los niveles d’esixencia. El sieglu XXI esixe que la formación y el conocimientu se conviertan nuna constante pelo llargo de la vida de les persones. Ye evidente que la capacidá d’una sociedá, como l’asturiana o como la española, pa tener éxitu nun mundu globalizáu depende del nivel educativu de los individuos que la formen, como tamién depende y muncho de la igualdá d’oportunidaes cola que cuenten p’acceder a la educación. Un proyectu que sía de futuru p’Asturies y pa España tien de considerar a la educación como una prioridá. Tenemos d’apostar por una educación de calidá, basada nel principiu de que la llibertá esixe tamién responsabilidá, al traviés del méritu, l’esfuerzu, la tolerancia y el respetu a los demás ciudadanos.

El nuestru sistema educativu ta, como periódicamente venimos comprobando, en puestos caberos nos indicadores internacionales de calidá. Añu tres añu axigántase la resquiebra que nos separta de les sociedaes avanzaes. El gobiernu del señor Zapatero foi introduciendo reformes na dirección enquivocada que como frutu solo llograron altes tases de fracasu escolar, abandonos prematuros de les aules, un baxu nivel de conocimientu d’inglés y la perda, delles veces dramática, d’autoridá del profesoráu. Cola so política educativa los gobiernos socialistes, estatal y autonómicu, premien la mediocridá y penalicen l’esfuerzu, y por ello conducieron a la educación nel nuestru país al llamentable estáu actual.

Por too ello, dende’l Partíu Popular planteamos un cambiu de dirección qu’apueste polos estudiantes, poles persones y pol so futuru. Nosotros queremos desarrollar una Política Nacional pa la Meyora de la Calidá de la Educación, que proporcione estabilidá a tol sistema y pueda garantizar ente otros los siguientes oxetivos: l’amenorgamientu del fracasu escolar, la igualdá d’oportunidaes nel sistema de beques, la solidaridá, la movilidá de los alumnos y el derechu a estudiar na llingua de tolos españoles en toles etapes del sistema educativu. Queremos que la formación en valores democráticos y ciudadanos sía transversal a toles materies que s’impartan, ensin requerir una asignatura específica. Queremos fortalecer el sistema de conciertos col envís de garantizar la llibertá d’elección de los padres. Queremos desarrollar un modelu d’enseñanza billingüe (castellanu e inglés) que s’acompañe, nel casu d’Asturies, d’una presencia digna de la nuestra llingua autóctona. Pa la formación n’inglés ye necesario un Programa Nacional de Beques qu’aumente les oportunidaes d’estudiu nel estranxeru. Queremos tamién facer un programa d’universalización, conocimientu y usu de les Tecnoloxíes de la Información y les Comunicaciones.

En resume, tanto Asturies como España merecen un sistema educativu que nos permita sentinos arguyosos. Y pa ello l’executivu tien de centrar la so acción de gobiernu en dar atención a los temes qu’en verdá esmolecen, como ye’l casu de la educación. España nun tien petróleu nin gas y nun va competir neso con otros países. Por ello nosotros, los asturianos, los españoles, tenemos de competir aportando persones formaes, competentes, que trabayen y que cada vez tengan más conocimientos. Ési ye’l nuestru retu más importante a cortu, mediu y llargu plazu.

Esbilla | del.icio.us