L'Asturies Lliberal

Pilar Fernández Pardo casó n'avientu pasáu, per ceremonia civil na Casa Conceyu Xixón, a Inés Benavente y Diego Moliner. Nesti actu, la presidenta del PP xixonés, portavoz del grupu municipal y diputada nel Congresu, emplegó la llingua asturiana y, por cortesía a la familia'l noviu, viniente de Castelló, dió llectura tamién a una versión en castellanu y deseo-yos felicidaes nestes dos llingües y en valencianu. Facemos alcordanza d'esti acontecimientu pa estremar la diferencia de sensibilidá y procuru pa col asturianu ente la xefa de la oposición municipal y l'alcaldesa socialista del conceyu. Nun queremos dexar de siñalar que Paz Fernández Felgueroso ye asturiana de nacencia y criada en Somió, y que Pilar Fernández Pardo nació en Madrid y pasó gran parte de la so vida fuera d'Asturies. Ye evidente que Fernández Pardo asumió ensin problemes la so asturianidá desque afincara na villa de Xovellanos, mientres que Fernández Felgueroso diríase que vivía y vive n'otru país.

Na Selmana de les Lletres, l’Aconceyamientu de Xuristes pol Asturianu quier amosar  la braera cara que los gobiernos español y asturianu-y ponen, per cincuenta y un selmanes al añu, a la llingua de nós: la represiva. Poro, escoyó’l so aniciu pa presentar el cuartu informe-denuncia escontra l’Estáu español énte’l Conseyu d’europa.
   Al aguarde de que merite’l so interés, resumimos darréu’l conteníu.
   “En data 10 d’ochobre de 2007, l’Aconceyamientu de Xuristes pol Asturianu zarraba, pal so unvíu al Conseyu d’Europa, el so tercer informe-denuncia (tituláu “L’agonía d’una llingua europea”) escontra l’Estáu español pol arrequexamientu y desamparu nos que tien asitiada a la llingua asturiana. Nelli atropábense 81 normes, 26 d’elles reguladores del sistema educativu, empobinaes al desaniciu del asturianu y, asina, contraries dafechu a les disposiciones de la Carta Europea de les Llingües Rexonales o Minoritaries.
   Pero d’entós p’acó les agresiones siguieron y n’ello ta l’orixe d’esti cuartu informe-denuncia, nel que se recueyen 14 nueves normes y 2 proyeutos que vinieron, nos caberos cinco meses, a enanchar la discriminación llegal del asturianu n’ estayes tan estremaes como’l desendolcu sostenible medioambiental; la educación infantil y profesional, el bachilleratu y la formación del profesoráu; na carrera fiscal y nel tratu nos tribunales de xusticia; na espublización de les normes; nel Nomenclátor Xeográficu Básicu d’España; énte l’Axencia Estatal d’Alministración Tributaria; nes rellaciones coles fuerces armaes y obligaciones de la Guardia Civil; na producción y distribución cinematográfica; na sociedá de la información; o nel Sistema Arbitral de Consumu”.
  
   Por mandáu de la Xunta Direutiva del Aconceyamientu de Xuristes pol Asturianu robla
   Xurde Blanco Puente
   Secretariu.

El secretariu xeneral del PP, Ángel Acebes, xustificó güei'l so determín de dexar esti cargu al sentir que yá cumplió una etapa qu'entamó fai cuatro años, y esplicó que lo fai después de dexase "la piel" pol so partíu, poles sos idegues y tamién "pol interés xeneral de los españoles". Pa dar a entender la so renuncia, Acebes manifestó que tien completao una etapa:"Yo asumiera una responsabilidá con Mariano Rajoy pa cuatro años y cumplíla". Les sos manifestaciones foron percurties y nun esclarió si va continuar o non como diputáu y si la so renuncia na Secretaría Xeneral del partíu a partir del congresu de xunu lleva parexo'l so abandonu de la vida política.

El presidente del Círculu Lliberal, na so condición de miembru del Comité Executivu Rexonal del Partíu Popular, va aconceyar cola dirección asturiana d'esta fuerza política pa estudiar víes de control, dende la Xunta Xeneral del Principáu, sobre aquellos elementos de la programación del canal públicu RTPA que fieran la sensibilidá de la ciudadanía, en virtú del usu chuscu o ridiculazante de les señes d'identidá d'Asturies. Tamién espondrá una propuesta de trabayu pal llogru, a cortu plazu, d'unes emisiones n'asturianu que nesi mediu comunicación supongan el 50% de la parriya, faciendo especial reseñu na importancia d'informativos na nuestra llingua vernácula.

Esta tarde entamó un envíu masivu de correos de protesta a la TPA pola presencia na so parriya de programes que fain risión de lo asturiano, en dientro d'una campaña que va dir aumentanto n'acciones a lo llargo del mes de mayu. Dende'l Círculu Lliberal ta faciéndose, igualmente, un llistáu d'empreses patrocinadores y collaboradores del programa Terapia de Grupo, col envís de proceder a encamentar per aciu delles víes el correspondiente boicot económicu. Toles iniciatives quieren llograr el desaniciu de los conteníos ofensivos contra l'asturianidá, y han completase con otres que darréu esixirán un presencia digna de la nuesa llingua na radiotelevisión público del país. 

antiasturianos

na TPA

NON

Empobina la to protesta pola ofiensa repetío contra la identidá asturiana a la estaya de contautu de Radiotelevisión del Principáu d'Asturies