L'ASTURIES LLIBERAL

Axente del Gobiernu d'esquierda repartiendo "progresía" na capital de Zimbabue

Cuando Zapatero toca la llira suaña con un mundu fechu pal so preste. Nesi mundu les perres del erariu público han ser pa los homosexuales y llesbianes d'un llugar tan español, o asturianu que tanto da, como ye la República de Zimbabue. Nesi oníricu mundu les perres de tola ciudadanía nun puen llegar a les families nuestres, les d'equí, les españoles, o asturianes que tanto da, de tola vida. Eso nun ye progresista, nin moderno, nin solidario, nin democrático. Cuando la clá del Zapatero que toca la llira dixo non, na sede parllamentaria del Soberanu (entiéndase por ello al Pueblu), a les propuestes de la pérfida derechona de 1.500.000 euros pa programes d'apoyu a la maternidá, de 6.000.000 pa un programa de formación y empléu empobináu a muyeres embarazaes adolescentes y/o inmigrantes, de reduición nun 50% de l'aportación empresarial na Seguridá social de la muyer embarazada, d'implantar una paga de 100 euros a les muyeres en paru con fíos menores de 3 años, de facer un plan de sofitu a les families col envís d'algamar la media europea n'ayudes familiares venceyaes al PIB, cuando eso pasó, dixo sí a les xeniales igües de xeitu esquierdista, al diezmu pa les minoríes sexuales del continente africanu, a 4.000.000 d'euros pa proyeutos de revisionismu de la Guerra Civil, a 7.000.000 d'euros pa monta-yos un chiringuitu a Arzak, Arguiñano y Subijana o a 300.000 euros pa que'l Ministeriu de la miembra Aído pague llibros d'investigaciones feministes. Cuando Zapatero toca la llira suaña con un mundu fechu a la so midida. Suaña y suaña, mentantu los probres mortales viven nuna pesadilla que nun termina.