L'ASTURIES LLIBERAL

La Casa Conceyu de Villaviciosa cuentá yá con indicadores n'asturianu. L'Ayuntamienteu, que tien un gobiernu de centru derecha, de coalición Partíu Popular-URAS, entamó asina a señalizar les instalaciones municipales. Un rétulu grande, allugáu a la entrada, indica la distribución de les estremaes dependencies. Otros rétulos más pequeños figuren en cada unu de los servicios y negociaos. Esta midida súmase al usu d'impresos billingües y de la toponimia tradicional va poco oficializada.

FONTE SEMEYA (C. Ronchel)

Talo como pidiere'l Círculu Lliberal d'Asturies, el grupu denomáu Observatoriu de la Política Llingüística yá nun ta allugáu na páxina web de la Oficina de Política Llingüística del Principáu. Esti fechu torga la que diba ser una venidera intervención na Xunta Xeneral, per parte la oposición, preguntando pol 'inesplicable' caltenimientu nesi soporte institucional.

Esti 'observatoriu' formárase en xineru de 2005, oficialmente como grupu asesor de la Oficina de Política Llingüística, pero na práctiva furrulaba como un grupu d'apoyu al gobiernu de coalición d'aquel entós. Nun tenía vinculación orgánica cola Conseyería de Cultura, siendo la so creación y funcionamientu dalgo bien poco tresparente. Presentáu como un "grupu de persones independiente, críticu y constructivu, con representatividá nel mundu de la cultura y políticu d'Asturies", en realidá yera un piñu de ciudadanos venceyáu na so totalidá a la izquierda, y destináu a aplaudir el facer del equipu gubernamental. Agora desapaez una incoherencia que yera ayena al organigrama de la dirección xeneral responsable de la normalización de la realidá llingüística de la nuestra comunidá.

PERSONES QUE FORMABEN L'AUTODENOMÁU OBSERVATORIU

• Francisco Álvarez, escritor y periodista
• Ramón Lluis Bande, escritor y director de cine
• Xuan Bello, escritor y miembru de l'Academia de la Llingua Asturiana
• Adolfo Camilo Díaz, xestor cultural y miembru de l'Academia de la Llingua Asturiana
• Xandru Fernández, escritor y profesor
• Manuel Fernández de la Cera, presidente del Conseyu de Comunidaes Asturianes y ex-conseyeru de Cultura del Principáu
• Cesáreo García, filólogu y ex-responsable de la Oficina de Normalización Llingüística del Conceyu d'Avilés
• Ismael González Arias, escritor y director de la Casa de Cultura de Mieres
• Vanessa Gutiérrez, escritora
• Francisco J. Llera Ramo, catedráticu de Ciencia Política y miembru de l'Academia de la Llingua Asturiana
• Taresa Lorences, escritora
• Pedro Alberto Marcos, director de Televisión Española n'Asturies
• Noemí Martín, diputada d'Izquierda Xunida
• Gonzalo Olmos, conceyal del PSOE nel Ayuntamientu d'Uviéu
• José Manuel Pérez Fernández, profesor de Derechu Alministrativu na Universidá d'Uviéu
• Berta Piñán, escritora
• José Uría Ríos, profesor
• Ignasi Vila Mendiburu, miembru del Comité Internacional pa la Salvaguarda de los Drechos Llingüísticos d'Asturies.

El semanariu Les Noticies publica na edición impresa (que non na dixital) del últimu númberu una interesante entrevista al diputáu popular na Xunta Xeneral, Emilio Pérez Cueva, onde ésti anuncia una proposición non de llei del PP pa que se reconoza la especialidá docente de l'asignatura de llingua asturiana. Reproducímosla equí pola so trescendencia.

-Tán acabante anunciar que van presentar una proposición non de llei pa que se reconoza la especialidá docente de Llingua Asturiana. ¿Por qué?

-Va pa unos díes fiximos un conceyu cola presidenta de l'Academia de la Llingua, Ana Cano, que nos esplicó por menudo la situación real de l'asignatura de Llingua Asturiana y del so profesoráu. Fomos sensibles a lo que nos dixo y, faciéndonos ecu de los que s'espunxo, pareciónos de xusticia qu'esti colectivu de profesores, más de 200, dexe de tar nuna situación totalmente anómala.

-¿En qué consiste, al parecer del PP, esa anomalía?

-Son profesores que tienen la so llicenciatura en filoloxía, qu'amás ficeron los cursos d'especialistes o espertos en Llingua Asturiana de la Universidá d'Uviéu, y nestos momentos tán nuna situación impresentable. Nun tienen reconocida esa titulación como cualquier otru profesor de cualquier otra materia, siendo esta del asturianu tan importante como cualquier otra.

-¿Parez-y bien que los escluyan del cuadru de personal orgánicu?

-Non, de nenguna manera. Nunca participemos d'esa idea. Abúltanos que la materia qu'imparten ye una más del currículu y nun tienen por qué tar escluíos estos profesores d'esta manera. Lo que vimos -en falando con Ana Cano y con un colectivu de profesores- ye que la Conseyería d'Educación ta tratándolos inxustamente. Merecen otru tratu ellos como docentes y tamién merez otru tratu l'asignatura qu'imparten. Lo que quier la Conseyería d'Educación, y nesto tamos d'alcuerdu colos profesores, ye facer de menos l'asignatura de Llingua Asturiana relegándola non a ser una maría sinón a dalgo absolutamente marxinal y ensin importancia.

-¿Qué diz esta proposición non de llei que van presentar?

-Instamos al Principáu d'Asturies a que se reconoza la especialidá de Llingua Asturiana pal profesoráu de Primaria y Secundaria. A ver qué contesta'l Gobiernu. Ye chocante: cuando ún fala con estos profesores ye cuando ún descubre toles contradiciones que tien el gobiernu asturianu col tema de la llingua. Toos estos profesores tán reconocíos, nel so espediente llaboral y salarial, como profesores de Llingua Asturiana. otra manera, la FSA nun quier nin sentir una palabra d'esti reconocimientu. Nun entendemos el porqué d'estes contradicciones. Remitímonos a la Llei d'usu y Promoción. Con esta llei buscábase dignificar el fechu cultural asturianu. Vemos que nestos años nun s'avanzó nada. Tamién resulta chocante'l fariseísmu d'IU: cuando tán na oposición manguen la gaita y el tambor al llombu y cuando lleguen al Gobiernu nun los vemos tan atentos a estes reivindicaciones tan xustes. Nós vemos esto como dalgo mui preocupante, una cosa mui seria. El planteamientu nun ye oficiacilidá sí, oficialidá non, sinón que tamos falando d'una problemática mui seria d'unos profesores que tienen una titulación reconocida. El conseyu Escolar del Estáu esixe que-yos reconozan esta especialidá. Esto ye lo que nós tamos trabayando con seriedá y rigor. Pienso que tien qu'haber una coherencia ente lo que yá ta aprobao na Xunta Xeneral y les demandes -yá digo que xustes- del profesoráu.

¿Cómo-y parez que va reaccionar el Gobiernu asturianu énte esta iniciativa?

-¿Qué esperamos? Sabemos que la presidenta de l'Academia de la Llingua Asturiana faló con tolos grupos parllamentarios y lo qu'esperábemos, de mano, yera una iniciativa unánime. Por esa razón decidimos qu'había que presentala yá porque cuerre priesa. Los profesores nun pueden principiar el cursu que vien na situación na que s'atopen. Esta proposición vamos presentala en cuantes que pase'l parón parllamanetariu, que se va dar nestes tres selmanes por causa de les elecciones al Parllamentu européu. A partir del 7 de xunu yo mesmu voi presentar esta iniciativa na Xunta Xeneral. Espero qu'haya coherencia. Toi seguru de que los profesores van tomar nota de lo que se ta faciendo nel PP y que van acudir el día que presentemos esta iniciativa. Ye fundamental pal so futuru profesional (y repito que tamos falando d'un colectivu de más de 200 persones). toi enfotáu en que nos vamos poner d'alcuerdu y que vamos llograr esi reconocimientu de l'asignatura de Llingua Asturiana.

-Alredor del asturianu hubo nos últimos años munchos debates. ¿Cuála ye la posición del PP nesti momentu?

-Nel PP asturianu respetamos la cultura d'Asturies y les sos tradiciones, ente les que ta la llingua asturiana. Pareznos qu'hai qu'afondar nel conocimientu de tolo que supón la llingua asturiana. Eso ye lo que tamos faciendo. Tenemos voluntá d'escuchar a toles partes. Cuando presentemos el proyectu de Lle d'Usu y Promoción, y aprobóse por unanimidá, pensemos que diba desenvolvese l'asuntu col rigor que merez. Pero vemos qu'ehí quedó la cosa estancada. Esa Llei d'Usu y Promoción del asturianu implica munchos aspectos que nun se desenvuelven. Son too contradicciones: fórmense profesores na Universidá y nun-yos reconocen la especialidá. El casu de los interinos ye tovía más sangrín. La nuestra posición ye tar ehí y esperando que lo aprobao na Xunta Xeneral se desenvuelva. Nel casu específicu de la educación, hai que mirar muncho los problemes del profesoráu cursu a cursu.

El Centru de Cultura Antiguu Institutu de Xixón va acoyer una sesión d'instalación d'un sistema operativu n'asturianu: Ubuntu. Va ser mañana sabadu, 16 de Mayu, ente les 10.00 y les 14.00 hores,  y ente les 16.00 y les 21.00 hores.

L'asociación Softastur y la Oficina Municipal de la Llingua de xixón entamen esta sesión, conocida tamién como 'Install Party'. L'oxetivu ye "instalar a toles persones interesaes un sistema operativu que-yos permita manexar un ordenador dafechamente n'asturianu"

Según la nota, "col sistema operativu Ubuntu pue facese cualesquier llabor, como restolar per Internet, ver vídeos, oyir música, escribir documentos, mandar o recibir correos electrónicos, ver oeditar semeyes, descargar música o películes, chatear... y too ello n'asturianu, ensin virus y de baldre".

La instalación pue facese nuna nueva partición, colo que nun se tien de desaniciar nin renunciar al sistema operativu que se tenga. La sesión ye abierta y de baldre y tamién se convida a asistir a tola xente interesao en saber y conocer en qué consiste Ubuntu, pudiendo decidir si quieren instalar esti sistema operativu o non sobre la marcha.

L'ARRIBADA. Ayeri, l'agregador de blogues de tol dominiu llingüísticu asturlleonés, Asturbitácora, llegó a los 201 sitios enllazaos. Arrexunta bitácores escrites n'asturianu, en llionés y en mirandés, y venceyaes a Asturies, Llión, Zamora, Cantabria y Estremadura.
Amás d'ello, inxerta tamién un directoriu de páxines web que va dir creciendo pasu ente pasu y, nos prósimos díes, a dir allugando tamién enllaces a fotologs.
Los blogueros que quieran amestar el so blogue a esti agregador puen comunicalo per aciu la dirección d'email que se facilita nésti.