L'ASTURIES LLIBERAL
Bitácora del Círculu Lliberal d'Asturies

Los sindicatos d'obediencia nacionalista ELA, LAB, ESK, STEE-EILAS, EHNE y HIRU tienen convocada una güelga xeneral pal viniente 21 de mayu nel País Vascu y Navarra. El secretariu xeneral d'ELA dixo que "reivindicamos instrumentos políticos y económicos pa decidir aquí al serviciu de la xente que los necesita y non de les élites económiques". Esplicó que, aparte diferencies ente les fuerces convocantes "ELA, LAB, ESK, STEE-EILAS -sindicatu d'enseñanza-, EHNE -agropecuariu- y HIRU -de tresporte- tán d'alcuerdu en convocar una güelga, lo que ye una decisión mui responsable ante l'ataque que tán sufriendo los derechos de los trabayadores".

El presidente del PP del País Vascu, Antonio Basagoiti, aseguró qu'Arantza Quiroga ye una militante distinguida del partíu n'Euskadi, y que'l fechu de que sía presidenta del Parlamentu Vascu supón l'amuesa de que la negociación col PSE, de que'l cambiu, "va en serio". Tamién afirmó que Quiroga será una magnífica presidenta del Parlamentu de Vitoria.

L'alcuerdu algamáu ente'l PP-PV y el PSE-EE tendrá importantes consecuencies nos medios de comunicación públicos del País Vascu. No tocantes a la televisión autonómica, la EITB, garantizaráse una llinia editorial que respete y defenda'l marcu constitucional y qu'asegure la oxetividá, veracidá y imparcialidá de les informaciones. Daráse especial atención a la difusión de valires democráticos y torgaráse tou espaciu a los terroristes, a organizaciones illegalizaes o a los que les representen, y xustifiquen o abelluguen les sos acciones.

Les representaciones gráfigues y infográfiques de la programación d'EITB inscribiránse na realidá política y institucional de la comunidá autónoma, ensin perxuiciu d'informar d'otres estayes. Va igualmente a reformase la llei pa terminar cola ineficacia y inoperatividá del actual Conseyu d'Alministración y pa simplificar la elección del director o directora. Tamién va caltenese y optimizase'l gastu, per aciu d'un plan de xestión con oxetivos enforma concretos.