L'Asturies Lliberal

Ignacio G. López-Dóriga (Vicepresidente del Círculu Lliberal)

Asturies ta gobernada en minoria polos socialistes d'Areces y failo con una tranquilidá de la qu'ellos mesmos tán ablucaos. 

Paez ser que los asuntos internos del Partíu Popular d'Asturies tienen al mesmu mui ocupáu y nun-y dexen facer oposición nel Parllamentu Asturianu.

¿Ónde tán les propuestes, el siguimientu de les actuaciones socialistes? Dende fuera paez más un noviazgu qu'una oposición.

Tendríen d'aprender del PP xixonés, que ta esbrexando, anque la so llider Pilar Fdez. Pardo tien dellos frentes abiertos: Aytu. de Xixón, Congresu de los Diputaos, y los propios del Partíu a nivel autonómicu y hasta llocal.

Son imprescindibles idees y cares nueves nel PP asturianu. Los sos votantes esixen una oposición más eficaz y una defensa de los intereses de tolos asturianos dende les files populares, con propuestes más concretes y por supuestu d'índole lliberal, que mos faigan salir d'estes "vacaciones" polítiques nes que paez que tán instalaos dellos dempués de les elecciones xenerales y que sirvan pa sacar a Asturies d'esta apatía y solucionar la crisis na que siguimos metíos.

Nota: Otru día falamos de les conversaciones sobre l'Estatutu.

Ignacio G. López-Dóriga

Ye bien sabío l’esfuerzu de munchos asturianistes por conseguir la oficialidá de la nuestra llingua. El PSOE y el PP contradiciendo les sos postures n’otres Comunidaes Autónomes nun l’apoyaran nunca y IU trató d’abanderar estos movimientos nel so discursu pero nun lo esixió cuando tocó poder. Los partíos nacionalistes n’Asturies tán fuera’l xuegu políticu na nuestra Comunidá y solo’l PAS llogró aprobar la Llei d’Usu durante’l gobiernu del PP de Sergio Marqués. 

Sin embargo, nestos momentos, esiste un movimientu internu nel PP que quier reconocer el derechu de los falantes n’asturianu y nesi sentíu Gabino de Lorenzo ta lliderando esa corriente que pretende nun tonu de normalidá, al igual que sucede na Comunidá Valenciana o na Gallega en tiempos de Fraga, oficializar l’usu del asturianu. 

Nestos últimos díes intensificáronse les declaraciones: el PP xixonés de Pilar Fernández Pardo esixe al Ayuntamientu que cumpla la llei no que respecta a la toponimia; Isidro Fernández Rozada declárase favoratible a la Oficialidá y Gabino d Lorenzo confírmalo en delles declaraciones y finalmente nuna entrevista en “Les Noticies”. 

Si la candidatura popular nun vence n’Asturies, el cambiu que se vien produciendo nel sen d’esti partíu pue vese frustráu y los promotores d’esti nuevu PP asturianu nun dispondrán d’argumentos suficientes nel prósimu congresu rexonal pa facese cola dirección y ente otros cambios na so política, defender la Oficialidá na viniente redacción del Estatutu. 

Ye’l momentu, de qu’al marxe de les simpatíes que despierten los partíos y los sos dirixentes a nivel nacional, los asturianistes del PAS, del URAS y d’otres organizaciones nacionalistes dean el so votu al PP, la fuerza necesario a los sos dirixentes asturianos pa que puedan defender los derechos de los falantes y algmar la naguada OFICIALIDÁ. 

Per una vez, el votu asturianista pue ser un votu util.

Ignacio G. Lopez-Dóriga

Acaben d’espublizase los peores datos sobre l’emplegu de los venticuatro años últimos: SILENCIU SINDICAL.  

Constátase una xuba de precios cercana al 8% nos artículos de primer necesidá: SILENCIU SINDICAL. 

Decrez d’una forma alarmante la contratación indefinida: SILENCIU SINDICAL. 

¿Por qué los ciudadanos tenemos de siguir pagando colos nuesos impuestos los salarios de los dirixentes sindicales y el costu de les sos organizaciónes?, cuando too paez indicar qu’anteponen los intereses electorales de la esquierda a los drechos de los trabayadores a quien dicen defender.

Ignacio G. López-Doriga

La selmana pasada tuve unos díes en Paris, y presentóse la ocasión de charrar sobre la política fecha por Nicolás Sarkozy con distintes persones que viven nel país vecín: taxistes, camareros, funcionarios, empresarios…, que representen distintos sectores de la vida económica y social de Francia. Pudi comparar le sos opiniones coles que persones asemeyaes me dieran fai agora un añu, antes de la llegada del ilustre Sarkozy a la Presidencia en Mayu del 2007.  

Naquel momentu la xente topábase desorientao ante un futuru inciertu, temerosos de nuevos actos vandálicos como los qu'enllenaron de coches incendiaos los suburbios parisinos. Alcontrábense nun caleyón ensin salida, pues munchos de los problemes, funcionarios con grandes privilexos, inmigración descontrolao, relaciones exteriores estancaes, etc… paecíen insalvables. 

Por embargu, nunos pocos meses los nuestros vecinos recuperaron la ilusión. Non toos tán d'alcuerdu colos sos métodos, nin coles sos idees, pero naide nun-y pue discutir que cumplió lo que-yos dixo na primer comparencencia ante los sos compatriotes el día de la victoria nes urnes:  “Devolveré a los franceses l'arguyu de ser franceses” 

Ye induldable qu'en Francia se produxeran dellos de los movimientos socio-políticos más importantes de la historia como la Revolución Francesa onde los “súbditos” convirtiéranse en “ciudadanos” dando empiezu, según dalgunos, a los primeros movimientos lliberales. Pue qu'agora teamos asistiendo a otru d'esos momentos, con un políticu democráticu que llidera al so pais con enerxía y que logró contaxar con ella a los sos conciudadanos y facer que'l restu d'Europa mire p'hacia Paris con cierta envidia. 

Rajoy ta estos díes allí. Esperemos que se contaxe un poco y sepa tresmitir ilusión a los ellectores españoles ¡ que falta nos fai cola que ta cayendo ! 

Nota en clave asturiana: L'antítesis d'esi mou de facer política ta n'Asturies y tien nome de poeta de la Roma d'A.C.

Ignacio G. López-Dóriga

La polémica desatada col casu Gallardón desoriéntanos a los ciudadanos d'a pie. L'Alcalde de Madrid enquivocóse pidiendo públicamente ser el númberu 2 y al emperrase nello. Dalguién nel so puestu tien otres maneres pa face-y llegar al presidente del partíu los sos enfotos. 

Rajoy enquivócase refugando la inclusión de Gallardón nes llistes al Congresu, polo menos en clave territorial que ye de lo qu'a la fin se trata. Nun podemos escaecer que l'edil madrilanu tien tirón ente una estaya de la población a la que nun-y presten delles postures del PP y ta más averada a les sos formes y idees.

Polo tanto, dos enquivocaciones nuna. ¡ Norabona !  

Esto vuelve a reabrir l'alderique sobre los métodos de facer les llistes por parte de los partíos políticos. Pero d'eso falaremos en breve. 

Nota en clave asturiana: ¿Ónde se metieron tolos que pronosticaron que la inclusión de Gabino yera para facilitar la entrada de Gallardón? Gabino ye muncho Gabino.

 Ignacio G. López-Dóriga (empresariu y vicepresidente del Círculu Lliberal)

Parez que nun sentó bien nes files socialistes que Manuel Pizarro se ponga al frente de los asuntos económicos de la oposición. 

Manuel Pizarro nun permitió que'l Gobiernu mangoniara la compra de la empresa qu'él dirixía pa favorecer a dalgunos de les sos empreses afines. Refugó una ufierta vergoñosa de 18 € por acción y tres un pulsu colos estamentos del Estáu consiguió pa los sos accionistes un valir superior a 40 € por acción. Ye dicir, consiguió un preciu de mercáu frente a un preciu políticu.

A mi prestaríame que dalguién capaz de duplicar el valir de les mios propiedaes, y de defender hasta'l final los intereses de los que-y paguen, fuera'l responsable de la política económica del mio país. ¿A usté non? 

¡ Y si ye ricu … meyor!