L'ASTURIES LLIBERAL
Bitácora del Círculu Lliberal d'Asturies

DEGOLANDO. Según la prensa de la comunidá vecina, l'alcalde llionés acaba de suspender l'actividá de la Llionpedia, y de poner en conocimientu de la xusticia la posible comisión d'un delitu d'apoloxía del nacismu y del xenocidiu cometíu por ésti durante la II Guerra Mundial.
La Enciclupedia en Llingua Llionesa nun solo esquita odiu hacia Asturies y l'asturianismu -inoro la razón, si ye que l'hai-; nun solo desprecia a los propios escritores llioneses, a los principales estudiosos y cultivadores del romance; nun solo falsifica la realidá con un enfotu que sería más granible aplicáu a fines constructivos; tamién -o quiciás por eso- desprecia les normes más básiques de la convenvencia y la democracia.
Los llevantos tocineros contra l'asturianu nun son, al cabu, obsesión enfermiza de los (i)responsables de la Llionpedia contra'l nuestru idioma, sinon la forma de pensar habitual y enfermiza d'eses persones nostálxiques de los asesinos nazis.
Detallen toles obres publicaes por Joseph Goebbels, pero inoren les de Gamoneda o Luis Mateo Díez, y desprecien a Roberto González-Quevedo que fexo pola llingua propia de los lleoneses más que toa esa farxa de paletos inorantes con guiyada y boína atornillada hasta la quexada.
Tranquiliza saber que les barbaridaes y babayaes sobre tolo asturiano de talu morgazu dixital ye consecuencia del ñulu respetu de los sos responsables -y sobremanera del so cabezaleru, Abel Pardo- hacia la verdá. Magar que, perriba de la oxetividá -rebaxable a neutralidá- atópase un mínimu saber tar, la educación y la vecindá de que tien qu'orniar a los conductores d'un mediu supuestamente informativu y formativu que lleva'l pomposu nome de "Enciclupedia".

ALEJANDRO GARCIA AVENDAÑO.

¿Por qué ciertu asturianismu políticu ye irrelevante na sociedá asturiana? Esta entruga tien facil rempuesta. Porque nun s'alluga nel llugar del mundu onde tán los asturianos. Porque ta a otres coses. Porque ta en Babia. Y p'amuesa un retalín. Estos díes les cabeceres de los periódicos echen fumu col "pelotazu" de Cabueñes. Les cabeceres de tolos periódicos d'Asturies menos, y perende va la cuestión, les de la "prensa" escrita n'asturianu. Los dos diarios más vieyos nesto nun dixeron tovía nada del tema. La edición dixital d'un semanariu "independiente", que toos conocemos pero nun merca naide, solo saca una noticiuca recoyendo la declaración aséptica del BA, que pa más inri ye una de les fuerces que gobierna en Xixón. Nin Infoasturies, nin Aruelu, gasten un llinia pa unu de los mayores escándalos políticos que se dieron nel más pobláu de los conceyos de la comunidá autónoma. Ye dicir, ciertu asturianismu políticu ta a lo de siempres. Corriéndose del gustu con un diccionariu asturianu-xaponés, que tará perbién, cola normalización onde seya, que tamien tará perbién, o coles movíes antifascistes, que pa cuatro colegues amás de tar perbién serán ¡la hostia!. Pero Asturies nun ta, nin de cerca, onde s'afaya esi ciertu asturianismu políticu. Un ciertu asturianismu políticu que pa la inmensa mayoría de los nuesos ciudadanos ye... los del bable. Y lo pior ye que, pa ciertu asturianismu políticu, nun existe otra forma de facer política que nun consista en seguir siendo los del bable.