L'ASTURIES LLIBERAL
Bitácora del Círculu Lliberal d'Asturies

HUMBERTO GONZALI.  El 18 de setiembre de 2009, na Universidá de Teherán, tres de l’añal concentración anti israelina pola mor del Día d’Al Qods (nome n’árabe de Xerusalén), el tiranu agarenu Mahmud Ahmadineyad afirmaba que l’Holocaustu xudíu, la Shoá, yera una mentira basada nun mitu ya imposible de probar. Empixáu cola so predicanzaina integrista remató con un "si l’Holocaustu, como ellos dicen ye verdá, ¿por qué nun ofrecen pruebes?". El casu ye qu’esti personaxe, amigu y collaciu nel ‘frente contraimperialista’ d’otres ayalgues autocrátiques como’l caudillu venezolanu Hugo Chávez, tien un aquello del cinismu de bona esplicación. Tamos en delantre d’un puntu con bien de malquerencies semeyes de les que tuvieron, y a tente bonete, los entusiastes seguidores del III Reich. L’Irán d’anguañu ta emperráu, igual que ficieron los esbirros de ciertu alloriáu austriacu, n’achucinar a tou xudíu, homosexual y opositor que pillen.

A los asturianos, tanto lo uno como l’otro, pintábanos que taba llueñe, mui llueñe, más que p’atrás nel tiempu o a munchos quilómetros p’hacia’l nuestru oriente. Pero mírate per onde, estos díes últimos fuimos quién pa descubrir que la bestia parda, el fediondu aliendu de la xenofobia y el fascismu, afayabáse a les puertes d’esti país que se llama Asturies, espardiendo les sos gafures peles tierres hermanes del vieyu Reinu de Llión. Tamos acabantes de saber, como si nos viniera de nuevos, que los mesmos rabudos qu’esfrenaben d’unos meses p’acó los sos complexos contra tolo asturiano andaben, testerones y combativos, imitando fatamente los berríos que davezu suelten na república de los ayatolás. Ello ye que nesi inventu abelpardianu pomposamente nomáu Llionpedia un rapaz, d’alcuñu auslli, pue qu’ansí por AUStria y LLIón, entamó a escribir coses tales como que nel Holocaustu nun morrieren millones d’hebreos sinon unos miles, o que los alemanes al gas zyklon B usábenlu cuasimente na so totalidá pa desparasitar. A la fin, d’esti despropósitu dalguién ye responsable, y va ser fácil d’atopar, por más que los integristes de turnu, nesti casu d’equí, nagüen por facenos pensar que la culpa ye vilba y nun la quier naide.

Mentanto’l ñeru filonazi de Llión cai, y se pega la zapada que correspuende, nesta historia l’enfotu democráticu ta viéndose nunos sitios determinaos, a saber, na prensa llibre, nel lleonesismu verdaderu, nel PP ya IU, en CCOO, nos xudíos que nun quieren llantar el clientelismu enriba la doliosa piel de la Shoá, nesos asturianistes que llaboren ensin roncíu nin galbana. Pelo contrario, silentes y guardándose, tán el socialismu en gobernanza y la mayoría d’un nacionalismu asturianu que desconoz a les batalles en verdá relevantes. Esto ye lo qu’hai. Nin más, nin menos.

Humberto Gonzali. El dictador yera d'ascendencia gallega. Exercía sobre'l país un control de fierru que duró décades. Solo esistía'l partíu oficial, el del réxime, l'únicu. Namás un sindicatu. Unos medios de comunicación única y esclusivamente al serviciu del caudillu y de la so censura. Nos años más duros miles de ciudadanos fueren asesinaos y munchos miles más tuvieron d'exiliase. De seguro que munchos de los qu'esto llean tendrán yá nel maxín a un individuu y a un llugar del planeta bien cercanu, pero non, nin l'unu nin l'otru son de nuestro, por más que nos suene l'escenariu. Esti añu, nel entamu del sieglu XXI, en Xixón, Asturies, Reinu d'España, Unión Europa, hai quien cellebra lo anterior con tol enfotu y atacao d'arguyu. Esti añu, la Fiesta de les Asociaciones enfótase nel 50 aniversariu de la revolución castrista. Esti añu, otru 'eventu' de la izquierda plural xixonesa cellebra la vixencia de la dictadura como forma de gobiernu. Y después vienen col so meapilismu progre naguando por metese en Fondures. Mal, señores de la progresía desnortiada, mui mal. Ser demócrata ye incompatible con xustificar l'ausencia de democracia. Si nun entienden esto, por favor, polo menos sían modestos y nun s'emperren tanto en dar llecciones al restu la humanidá.

Blogue d'Humberto Gonzali. Irán ta desangrándose. Tolos díes miles d'iraníes, especialmente la mocedá y les muyeres, protesten nes cais contra'l pucherazu d'Ahmadineyad, esi fascista enfotáu n'entamar un segundu Holocaustu y al que bien aína felicitó un patéticu tiranu como Hugo Chávez. Tolos díes hai persones que son asesinaes polos esbirros que sirven a un gobiernu que defende les lapidaciones, les amputaciones y la tortura sistemático. Tolos díes xente farto diz que nun ta dispuesto a renunciar a la llibertá. Por embargu, nun vemos nenguna manifestación de la izquierda, sía ésta más o menos plural, refugando les atrocidaes del réxime teocráticu. Naide nun gorguta nesa estaya del campu políticu. Nin los nacionalistes, nin IU y los sos satélites, nin el PSOE que tien como sociu de la so allianza de civilizaciones al estáu de los ayatolás. Si la décima parte de los desmanes que se tán cometiendo n'Irán fueren responsabilidá, masque indirecta, de los EEXX de Bush, toos sabemos que llevaríemos yá una carrapotada manifestaciones de tou tipu. Pero claro, aquí los malos son otros. ¿Ónde tán les feministes de la izquierda que nun se manifiesta poles muyeres que n'Irán son reprimíes, golpiaes o lapidaes? ¿Ónde tán les asociaciones de gais, llesbianes y transexuales, de continuo allabancioses col señor Zapatero, que nun se manifiesten polos homosexuales que n'Irán son aforcaos nes places públiques pola mor de la so condición sexual? ¿Ónde tán los múltiples grupos de solidaridá con milenta pueblos que nun se manifiesten poles persones que n'Irán sufren opresión ya inxusticia? En casa y bien contentos, a lo que paez. Nun paez que la izquierda cazurra, subvencionable y pancartera, tea por denunciar les tropelíes que pasen n'Irán. Eso sí, pa cuando monten el prósimu baturiciu cola escusa progre de turnu, polo menos que tengan la decencia de nun dar llecciones de democracia al restu la humanidá. Que pa eso yá tienen al amigu venezolanu.

Blogue d'Humberto Gonzali. El mayor cáncanu de les izquierdes del Reinu, y de xemes en cuando de ciertu nacionalismu periféricu de centru derecha, ye la tendencia cíclica al frentismu y a la política cainita. Lo peor d'esi cáncanu ye qu'aveza terminar mui mal. Nun fai falta remembrar los tristayos episodios de la historia española pa decatamos bien aína de lo que falo. El casu ye que tres la llegada del PSOE al poder en 2004, otra vuelta d'una manera poco inocente, percorrió la xeografía patria un enfotu inquisitorial y prerrevolucionariu que munchos namás conocieren polos llibros. L'espíritu chequista resucitara y el so primer frutu foi la estigmatización del principal partíu de la oposición. La izquierda plural robló en Cataluña'l so pautu del Tinell, que nun tenía más aquello que fuxir del PP como de la peste más fedionda. Cabo d'ello, aquel tan 'democráticu y progresista' cordón sanitariu, teorizáu ensin mázcara nenguna pol esperpentu de Berisso. El subvencionable Federico Luppi dicía, firme l'ademán, aquello de "“tenemos la obligación irrenunciable —nos va la vida y el país en esto— de crear un cordón sanitario para evitar que esta derecha más que ultramontana, cerril, troglodita, casi gótica, se adueñe del pensamiento y el espíritu español”. Y tengo de dicir que n'Asturies húbolos, y húboles, como non, que se sumaren al podrén d'esti sectarismu, que s'empixaren como adolescentes berriondos colo que denomaben 'la nueva transición'. Pero la realidá ye testerona y nun se pliega a los caprichos y ocurrencies de dirixentes de razociniu mediopensionista. En 2009 de tou aquel mangaráu nun queda nin un rispiu. Nun hubo nueva transición, nun se reescribió la historia, nun nació una gloriosa dómina rexida pol bálsamu socialdemocrata; y el señor Luppi que colara de la so Arxentina, corralito mediante, volvióse mudu ya invisible d'un tiempu a esta parte. En 2009 el nuevu réxime solo produz l'anunciu d'acontecimientos planetarios y millones de paraos. Y pa remate, entamen los mensaxes que nacíos en Cataluña s'empobinen pa la Génova madrilana. El llider de CiU, Artur Mas, lleva díes canciando les escelencies d'otru pautu bien estremáu, aquel del Majestic de 1996, ente otres coses porque los converxentes saben que, a diferencia de los socialistes, los populares sí cumplen lo qu'alcuerden, y amás, nun nos engañemos, persaben que'l presidente de la ceya circunflexa y la so corte arrecienden cada vegada más a cadabres políticos. Y tocantes a la allegre muchachada que con entusiasmu berrara consignes un día de marzu, na carbayona cai de Manuel Pedregal, lo que son les coses, namás-yos queda'l mal tragu de negar lo innegable y de fabular sobre lo contrastable, por más que la marcha les coses vaya garrándolos de seguío col pasu cambiáu. Suel pasar cuando se xuega al cordón sanitariu; delles veces nun hai forma de caltener a lo que dende'l prexuiciu se desprecia.

Blogue d'Humberto Gonzali. Ta visto que'l socialismu d'estos años últimos entama a tener un ciertu aire 'franquista' cada vuelta más evidente. Nun va mucho delles criatures socialistes, como los señores Bermejo y Garzón, daben fiel amuesa de la so inquietú pola cinexética, y amás per paraxes que décades atrás abellugaren asemeyaes aficiones de los xerifaltes d'aquella. Agora enterámonos de qu'Alberto Saiz, esi director del CNI al que José Bono escoyó cuando'l 11-M taba bien recién, tamién cuenta con rixu deportivu. Eso sí, por más que sían toos mui progres, na socialdemocracia planetaria y obamista de ZP tamién hai clases. El señor Saiz non solo caza, arriendes d'ello piesca, y fai dambes coses perende, más aculló de les llendes nacionales, que pa les son ínfules el polvu la dehesa paez ser poca cosa. Y ehí tenemos al nuestru xefe d'espíes, amirando ente plasmáu y orgásmicu, l'exemplar de pexe que cuelga como turística ofrenda de la mar del Senegal. Lo malo, amás de recordanos a los más retorcíos ciertu yate de nome Azor, ye que la feliz ocurrencia mariniega del señor Saiz pagámosla tolos ciudadanos del Reinu. Vamos, que los viaxes de caza y piesca del espía máximu van a cuenta de les perres de toos, lo que per otra parte ye una tradición de vieyo de la xente del PSOE. Sicasí, lo que más ye pa fadiame ye la poca profesionalidá del nuestru serviciu d'intelixencia nel momentu d'amazcarar presencies comprometíes en ciertes semeyes. Nesto'l CNI socialista ye munchu más casposu y chapuceru que los sos colegues del primer franquismu. Ente'l caretu repetíu d'un sarxentu La Benemérita pa salva-y "el rostru" al amigu Alberto, y el Franco retocáu nel famosu alcuentru d'Hendaya, hai tou un mundu. Vamos, que'l socialismu zapateril alliará civilizaciones, pero p'asuntos políticamente escabrosos ye un mal remedu del réxime nacionalsindicalista. Nada raro per otra parte; d'un estáu que tien de presidente de Gobiernu a un personaxe tan chuscu como esi señor de les ceyes circunflexes pue salir cualaquier cosa, hasta un director del CNI que, corrupteles aparte, ye un bon semeyu d'Anacleto, agente secreto.